Close

يوازي نانی ـ د ماشومانو لپاره منظوم نکل

source of image: https://angelavaught.files.wordpress.com/2012/02/test9j7c1606-baby-lamb.jpg

 د ماشومانو له پاره ورته نور مواد پر www.kochnai.com هم لوستلای سئ.

ناني هلک ويل و پلار ته
راڅخه مه ځه نن و کار ته
وخت راته نه لري زما مور
په کار مصروفه وي د کور
نه راکوي و ماته وخت
پاکوي سرای او کله تخت
کله کټو باندي کوي
کله اوتو راته کوي
په کومه ورځ چي کالي مينځي
تندي ته ژر ورکوي ګونځي
راته وای مه کوه ته شور
آواز ته مه ورکوه زور
بس ټوله ورځ زه او زما مور يو
سهار ماښام بس موږ پر کور يو
ستړی چي ته له کاره راسې
زما په ليدو بيا په خندا سې
خو وخت و لوبو ته نور نه وي
اول ډوډۍ بيا بيدېده وي
سهار وختي بيا کار ته ځې ته
ماښام ناوخته بيا راځې ته
پلار ويل زويه زما ګرانه
زما زړګيه زما ځانه
ته يو نانی واوا هلک يې
خو د خبرو څخه ډک يې
پلار چي راګرځوې له کاره
له کاروباره او روزګاره
بيا به پيسې نه لرم نور
چي درته رانيسم شیان نور
نن به لا ولاړ سم زه و کار ته
سهار وختي بيا ځم بازار ته
درته به رانيسم زه وری
چي وي ټنډ منډ او وي نانی
د زنګولې به يې شرنګی وي
هغه به دوست ستا پستکی وي
ناني هلک ويل و پلار ته
ژر ژر ته ولاړ سه نن و کار ته
د خوشالۍ څخه هک پک(۱)
وېښ په سهار چي سو هلک
د خوب په خونه کي ژړا وه
د يو نانۍ انجلۍ اونګا(۲) وه
مور ويل درکړله خدای خور
يوازي نه به يې ته نور
نانۍ په خونه کي ژړل اونګا اونګا
دباندي وري ناني کول اومبا اومبا

شاعر : احمدولي اڅکزی
مرستياله : نبا اڅکزۍ(شپږکلنه)

د ۲۰۱۶ کال د اپريل ۲۷مه نېټه، بون


(۱) هک پک: حيران
(۲) اونګا: د تازه پيدا سوو اطفالو ژړا

هيله: که مو دغه مطلب خوښ سوی وي نو هيله ده چي په فيسبوک کي يې share کړئ.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د کاپي کولو په صورت کي د دغه ليکنې اصلي لينک او د ليکوال نوم يادول ضروري دي.
Legal Note حقوقي يادونه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د دغه وېبلاګ لاندنۍ نوري ليکنې هم ولولئ:
پنځه حسه ـ د ماشومانو شعر
يو دوه ـ د ماشومانو شعر
لس موږکان ـ د ماشومانو لپاره منظوم نکل
زمری او نانی موږک ـ د ماشومانو لپاره منظوم نکل
څلور دي کال کي موسمونه ـ د ماشومانو شعر
د ملالۍ نانۍ خور ـ د ماشومانو شعر 

خپله تبصره لاندي ثبتولای سئ

0
ستاسو تبصره به د مسؤلو کسانو د کنټرول وروسته خپره کړله سي.
  • پر دغه مطلب ته اوسه کومه تبصره نده سوې.
Loading...
Loading...