Close

ازلي وږي او ښادي ـ منظوم نکل

 

يو سړی راغلی يو واده ته
کښېنست بيا دی ليده کاته ته
سړی سپينږری ؤ زهير ؤ
کړوپ ؤ پر ملا کوږ يې شاتير ؤ
يو بل مېلمه ورته نژدې سو
ځوان د محفل په قصيدې سو
د جلات خان ويل خوښي ده
د زوی واده نن يې ښادي ده
راغلي دوه زره کسان دي
ټول د محفل شان ته حيران دي
دلته دي ورجي اته رنګه
کباب پسونه څنګ تر څنګه
دولس يوازي سلاتې دي
تر شلو زياتي ښې مېوي دي
غورمې قورمې خو بې حساب دي
سل شربتان خو بس سېلاب دي
لس سندرغاړي دي راغلي
له لس ملکونو دا ښاغلي
د جلات خان د رزړه خروښ دی
ښایسته محفل ښه جم و جوش دی
سپينږری غوږ ؤ دې بيان ته
بيا سو ګويان و دغه ځوان ته
ويل زه پلار د جلات خان يم
د خدای له بيري په ګريان يم
ؤ په ډاګونو کي موږ تږي
له شل نسلونو ؤ موږ وږي
اوس جلات خان چي قاچاقبر سو
د دې ساده خلکو رهبر سو
دی درواغجن سياست مدار سو
وطن فروش دی لوی تجار سو
کوي سوداوي د سرونو
خريد فروش د ضميرونو
نن چي بيا جوړه دا مېله ده
له حاضرينو زما ګيله ده
ټول چي راغلي مېلمانه دي
ټول مالداران په نس ماړه دي
دا ملکان دا ملايان ټول
دا ليکوالان دا شاعران ټول
دا جنرالان دا وزيران ټول
دا سياستوال دا وکيلان ټول
دوی ښه خبر دي چي حرام دی
مال زما د زوی د غلا تالان دی
په ښار کي زموږ کونډه يتيم سته
لوږه حاکمه درد عظيم سته
بيا هم حاضر چي دي ډوډۍ ته
د حرام مال حرام خورۍ ته
دوی بل څه نه دي ناپوهان دي
ړانده پر ظلم ظالمان دي
پاته نور ټول غوړه مالان دي
يا ساده ګان بې سوادان دي
داسي ښادۍ داسي ودونه
چي بې حساب يې وي خرڅونه
دا ډګرونه د سياليو
د شوبازيو خاربازيو
د کبر دا لوی سالونونه
دا د اصراف لوی ماشينونه
د شاته پاته خلکو کار دی
د ازل وږو خلکو کار دی

احمدولي اڅکزی، د ۲۰۱۶ کال د اګست ۳يمه نېټه، بون

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د کاپي کولو په صورت کي د دغه ليکنې اصلي لينک او د ليکوال نوم يادول ضروري دي.
Legal Note حقوقي يادونه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د دغه وېبلاګ لاندنۍ نوري ليکنې هم ولولئ:
د کوزدې جرګه ـ منظوم نکل
اوه بزګړي او شرمُښ ـ منظوم نکل
قلم و قلم ته ـ منظوم نکل
تور مُلا او سپين مُلا ـ منظوم نکل
پيری ـ منظوم نکل
ايکاروس (ژباړه له يوناني اساطيرو) ـ منظوم نکل
پردۍ بڼکي ـ منظوم نکل
کارغه او ګيدړه ـ منظوم نکل
نامانوس بوی ـ منظوم نکل
د ناديده ګانو کلی ـ منظوم نکل
سوی او کيشپ ـ منظوم نکل
دېب په بوتل کي ـ منظوم نکل
کڼه چونګښه ـ منظوم نکل
يوازي نانی ـ د ماشومانو لپاره منظوم نکل
سرزوره منطق ـ منظوم نکل
نکاح د ع و غ ـ منظوم نکل
دوه سادګان ـ منظوم نکل
لس موږکان ـ د ماشومانو لپاره منظوم نکل
وړه زڼه ـ منظوم نکل
تا مسيحيت کړلی افغان ـ منظوم نکل
يا شل پيازه يا شل دُرې ـ منظوم نکل
پاچا، وزير، غلام او ړوند سړی ـ منظوم نکل
زمری او نانی موږک ـ د ماشومانو لپاره منظوم نکل 

خپله تبصره لاندي ثبتولای سئ

0
ستاسو تبصره به د مسؤلو کسانو د کنټرول وروسته خپره کړله سي.
  • پر دغه مطلب ته اوسه کومه تبصره نده سوې.
Loading...
Loading...