Close

د پردېس سلاته ـ منظوم نکل

source of image: http://www.culinarycory.com/wp-content/uploads/2010/08/Mexican-Tomato-Salad.jpg

 په مُشتريانو ريستورانت يو ؤ آباد
داسي هيواد کي چي بازار يې ؤ آزاد
د نړيوال شرکت وه څانګه دا زړه
د څو کړيو د ځنځير کړۍ وړه


ژر او آسان چا مړولای سوای خپل ځان
خواړه مشروب دلته چټک ول هم ارزان
چِپس پټاټې او شربتان به خرڅېدل
برګر خواره څوک کښېنستل څوک پاڅېدل


دلته کارګر ول بې حساب په کار کي بوخت
په پخلنځي کي به ولاړ ول سره جوخت
کار يې دقيق ؤ لکه وي چي زرګران
داسي چټک لکه ماشين ول دا خواران


په پخلنځي کي نصيحت کاوه يو کس
ويل يې بل ته چي صرف زيار باسه او بس
ويل ستا پلار چي راته وکړلې زارۍ
ستا په راتلو کي مي بيا وکړې همکارۍ


دېرش کاله مخکي وم زه ستا په شان يو ځوان
رامسافر سوم له وطنه، وم نا توان
زه پوروړی وم قرضې ولې جاري
دا ستا په شان چي مي کړه پېل دلته خواري


د چرګ اذان پر وخت به پېل سو زما کار
صافه کول به ما ميزونه په زر وار
د تشنابونو او دفتر او پخلنځي
پاکي مي دنده وه، کوله مي هرځي


هم آمران هم مزدوران هم کارګران
راضي زما څخه ول ټول دا همکاران
مدام آمر د کار ته وم چي تابعدار
ځکه نو وم مدام مشغول صاحب د کار


قرضې زما سوې په لس کالو کي ادا
خلاص له پيغوره سوم د پلار او د دادا
بيا دا کارګر په افتخار پرې کړ رومی
داسي په ناز لکه چي وي هغه غمی


وروځه يې پورته وه يوه او کښته بله
بيا په ګفتار سو ويل واوره زما ګله
پنځه ويشت کاله چي مي وکړلې پاکۍ
نو په نصيب مي سوې دا لوړي ترقۍ


ښه په مزه چي په روميانو کي اخته يم
وياړمه زه چي نن مامور په سلاته يم
شل کاله ته که په پردېس کي سې اخته
کيدای سي ستا هم په نصيب سي سلاته

 

احمدولي اڅکزی، د ۲۰۱۶م کال د اګست ۱۷مه نېټه

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د کاپي کولو په صورت کي د دغه ليکنې اصلي لينک او د ليکوال نوم يادول ضروري دي.
Legal Note حقوقي يادونه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د دغه وېبلاګ لاندنۍ نوري ليکنې هم ولولئ:
سوالګر او سخي ـ منظوم نکل
ژوند او هنر ـ منظوم نکل
منطق او تعليم ـ منظوم نکل
دوه سره يو بوک ـ منظوم نکل
ازلي وږي او ښادي ـ منظوم نکل
د کوزدې جرګه ـ منظوم نکل
اوه بزګړي او شرمُښ ـ منظوم نکل
قلم و قلم ته ـ منظوم نکل
تور مُلا او سپين مُلا ـ منظوم نکل
پيری ـ منظوم نکل
ايکاروس (ژباړه له يوناني اساطيرو) ـ منظوم نکل
پردۍ بڼکي ـ منظوم نکل
کارغه او ګيدړه ـ منظوم نکل
نامانوس بوی ـ منظوم نکل
د ناديده ګانو کلی ـ منظوم نکل
سوی او کيشپ ـ منظوم نکل
دېب په بوتل کي ـ منظوم نکل
کڼه چونګښه ـ منظوم نکل
يوازي نانی ـ د ماشومانو لپاره منظوم نکل
سرزوره منطق ـ منظوم نکل
نکاح د ع و غ ـ منظوم نکل
دوه سادګان ـ منظوم نکل
لس موږکان ـ د ماشومانو لپاره منظوم نکل
وړه زڼه ـ منظوم نکل
تا مسيحيت کړلی افغان ـ منظوم نکل
يا شل پيازه يا شل دُرې ـ منظوم نکل
پاچا، وزير، غلام او ړوند سړی ـ منظوم نکل
زمری او نانی موږک ـ د ماشومانو لپاره منظوم نکل 

خپله تبصره لاندي ثبتولای سئ

0
ستاسو تبصره به د مسؤلو کسانو د کنټرول وروسته خپره کړله سي.
  • پر دغه مطلب ته اوسه کومه تبصره نده سوې.
Loading...
Loading...