Close

د ځنګل جګړه ـ منظوم نکل

source of image: https://mir-s3-cdn-cf.behance.net/project_modules/disp/4ccfa415209050.56038023b6a17.jpg

 

په يو ځنګل کي وه جګړه د حيوانانو
د سرو بزګړو، د پسونو د غوايانو
د تور چرګانو، د سويانو، موږکانو
د سپين اسانو، غرڅنيو، آهوګانو
د هرې ډلې چي معلوم څو مشران ول
د وري په پوست کي شرمښان ول، خنځيران(۱) ول
دا مشران چي ول له جنګه ګُريزان ول
مړه به هغه ول چي پياده به عسکران ول
دا مشرانو به خوړل زخميان او مړي
ټول عسکران چي به کمزور ول او يا ستړي
د دې جګړو چي مخالف عام حيوانان ول
خوړل کېدل زيات چي کوم څوک سابه خوران ول
درندګانو خنځيرانو ته مېله وه
له څو کلونو را راوانه دا جګړه وه
په دې جګړه کي خنځيران لا زورور سول
درندګان چي ول هغوی ټول خېټور سول
کله زاړه چي مشران دا خنځيران سول
درندګان دا حيوانانو ته ګويان سول
ويل جګړه به نوره نه کوو چي بس ده
ډېره اوږده سوه دُښمني دا نوره بس ده
موږ به نظام ښکلی رامنځ ته کړو يو نوی
نه به جګړه وي نه به وينه وي نه مړی
په دې ځنګل کي به حاکم نوي ځوانان سي
ورباندي ښاد به د ځنګل ټول حيوانان سي
له دې اعلانه حيوانان مثبت خيال سول
د سولي ژوند ته هيله مند سول ډېر خوشال سول
په دغه حال کي يو عقاب هم په بيان سو
د دې ځنګل و حيوانانو ته ګويان سو
ويل زه څارم له هوا څخه جنګونه
مشران وينم له فضا لوی لوی نسونه
تاسو چي کله په جنګو کي ګرفتار واست
په خپلو وينو کي چي ډوب له ژوند بېزار واست
دفن کول چي دا ځنګل مړي چيچيان خپل
درندګانو زېږول درته بچيان خپل
ستاسو په غوښو يې هغوی درته لويان کړل
سلو پردو کي يې هغوی درته ځوانان کړل
دغه لېوان دا خنځيران دا مشران ټول
مني په تاسو خپل راتلونکي قاتلان ټول
که په رشتيا تاسو له جنګه په عذاب ياست
په دې جنګو کي له بدتره هم خراب ياست
نو هغه څوک چي يا پخپله کوم لېوه وي
يا ملاتړی يا ملګری د لېوه وي
هغه حيوان چي خوري دی غوښي د حيوان
يا په حرامو يې چاغ کړی وي خپل ځان
که وي دی پلار او يا که زوی وي د خنځير
يا په جګړو کي بډای سوی وي امير
هيڅکله مشر چي يې جوړ نه کړئ د ځان
او نه په حکم يې بل ووژنئ يا ځان
چي خپل زوی ساتي د بل استوي و جنګ ته
داسي خنځير مشر چي پرې نږدئ خپل څنګ ته

احمدولي اڅکزی، د ۲۰۱۶ کال د سپتامبر ۱۰مه نېټه، بون

(۱) د Entelodont په نوم لرغونی د خنځيرانو نسل غوښې خوړونکی ؤ

 


ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د کاپي کولو په صورت کي د دغه ليکنې اصلي لينک او د ليکوال نوم يادول ضروري دي.
Legal Note حقوقي يادونه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د دغه وېبلاګ لاندنۍ نوري ليکنې هم ولولئ:
مچمچۍ او زمری ـ منظوم نکل
خواږه شيان ـ د ماشومانو منظوم نکل
خر او پاچهي ـ منظوم نکل
د ښامار هګۍ ـ منظوم نکل
د سپي او بيزو پاچهي ـ منظوم نکل
موږک پهلوان ـ د ماشومانو منظوم نکل
حلال چينايي ـ منظوم نکل
له بلي نړۍ ـ منظوم نکل
د پردېس سلاته ـ منظوم نکل
سوالګر او سخي ـ منظوم نکل
ژوند او هنر ـ منظوم نکل
منطق او تعليم ـ منظوم نکل
دوه سره يو بوک ـ منظوم نکل
ازلي وږي او ښادي ـ منظوم نکل
د کوزدې جرګه ـ منظوم نکل
اوه بزګړي او شرمُښ ـ منظوم نکل
قلم و قلم ته ـ منظوم نکل
تور مُلا او سپين مُلا ـ منظوم نکل
پيری ـ منظوم نکل
ايکاروس (ژباړه له يوناني اساطيرو) ـ منظوم نکل
پردۍ بڼکي ـ منظوم نکل
کارغه او ګيدړه ـ منظوم نکل
نامانوس بوی ـ منظوم نکل
د ناديده ګانو کلی ـ منظوم نکل
سوی او کيشپ ـ منظوم نکل
دېب په بوتل کي ـ منظوم نکل
کڼه چونګښه ـ منظوم نکل
يوازي نانی ـ د ماشومانو لپاره منظوم نکل
سرزوره منطق ـ منظوم نکل
نکاح د ع و غ ـ منظوم نکل
دوه سادګان ـ منظوم نکل
لس موږکان ـ د ماشومانو لپاره منظوم نکل
وړه زڼه ـ منظوم نکل
تا مسيحيت کړلی افغان ـ منظوم نکل
يا شل پيازه يا شل دُرې ـ منظوم نکل
پاچا، وزير، غلام او ړوند سړی ـ منظوم نکل
زمری او نانی موږک ـ د ماشومانو لپاره منظوم نکل

خپله تبصره لاندي ثبتولای سئ

0
ستاسو تبصره به د مسؤلو کسانو د کنټرول وروسته خپره کړله سي.
  • پر دغه مطلب ته اوسه کومه تبصره نده سوې.
Loading...
Loading...