Close

تقوادار «شرابي» ـ منظوم نکل

source of image: http://bit.ly/2pFdjHF

 د پخواني وختو کيسه ده بيان سوې
په سلطنت کي د عثمانو عيان سوې
دوه مسافر سول پر بازار باندي راپېښ
يو ناپرسان مړي ته سول په ښار کي هېښ
خلک د ښار پر لار روان ول لاپرواه ول
که څه چي مړی يې ليدی ښه په آګاه ول
په زوره ږغ کړ مسافر ويل ښاريانو
تاسو يې نه وينئ دا مړی ساکنانو
يو لاروي ورته ويل دا شرابخور ؤ
پر بدو لارو پر زنا يې هر وخت زور ؤ
د داسي بد سړي له مړي موږ بېزار يو
نه لېواتيا لرو نه موږ ورته وزګار يو
مسافر وويل له ښو که ګريزان ؤ
ګاونډی ستاسو بالاخر هم مسلمان ؤ
همدا ؤ پورته مسافرو کړ دا مړی
کور يې پيدا کړی د دې مړي هم يې کلی
کونډي چي کله مړی وليد د خپل زوج
د زړګي غم يې بيا تر سترګو وکړ اوج
کونډه د خپل سړي و مړي ته ګويان سوه
ويل «تقوادار وې ته بېشکه» په ګريان سوه
کله چي واورېد مسافرو دا بيان
نور پرېشان او لا هم نور سول دوی حيران
حال دوی بيان کړ و دې ښځي ته د ښار
چي خلکو څه ويل د ښار او د بازار
ښځي ويل سړی يې ډېر ښه مسلمان ؤ
ډېر متقي ډېر اخلاصمند ډېر مهربان ؤ
هغې ويل مرحوم به تلی و ميخانو ته
يا د شرابو جوړونکو کارخانو ته
ده به بېرل بېرل بيا واخيستل شراب
چي پټ يې توی کړي په ناله کي د بدآب
بيا به دی خوښ ؤ چي شراب يې کړل راکم
هم ګناهونه شرابيان يې کړل راکم
مرحوم به تلی په توره شپه د بدکار ځای ته
د بدلمنو د ښارګوټو کوڅو پای ته
ده به پيسې ورکړې يوې ته ويل بند کړه
د ګناه کار او دا ازار دي نن شپه بند کړه
بيا به دی خوښ سو چي بندي سول شيطانان
له بدکارۍ چي به يې بند کړل انسانان
ما به ويل سړيه مړ به سې په ښار کي
خلک به بد وړي ستا له مړي په بازار کي
مرحوم به وخندل ويل چي وبه يې ګورې
سلطان به زما جنازه لولي ته به يې ګورې
ځوان مسافر چي بيان واورېد نو ګويان سو
ويل زه سلطان دا مي وزير بيا په ګريان سو
موږ ؤ راغلي په جامو عامو کي ښار ته
چي مستقيم معلومات ټول کړو خپل وکار ته
سلطان بيا ورکړ غسل مړي ته پخپله
دی سو امام د جنازې د لمونځ په خپله
لوی سرداران، لوی حاکمان لوی وزيران ول
دې جنازې ته حاضر سوي عالمان ول
نو مسلمانه ښه انسانه ښه عاقله
صرف په ظاهر قضا ونه کړې ته غافله

احمدولي اڅکزی، د ۲۰۱۷ کال د می ۱۲مه نېټه، بون

د ليکوال يادونه: دغه داستان مي د عثماني خلافت د سُلطان مراد رابع په هکله يو چيري په انګريزي ژبه لوستلی ؤ.

 

د ماشومانو د منظوم او منثور نکلونو وېبپاڼه
www.kochnai.com

د کوچنی ټکی کام د نکلونو ليسټ او لينکونه
http://bit.ly/2ppNEpJ

د احمدولي اڅکزي د نکلونو ليسټ او لينکونه
http://bit.ly/2h9CRwc

د قاموسونه ټکی کام ټول اعلانونه
http://bit.ly/2fZf7dO

د تکراري سوالونو جوابونه
FAQ http://bit.ly/1IZm3uV

د قاموسونه ټکی کام څخه د کار اخيستلو ويډيو
http://bit.ly/2gXsf0v۲۴

وړيا پښتو قاموسونه د اندرويد موبايل له پاره
http://bit.ly/1IFKLAw

د آی فون لپاره هم د پښتو قاموسونو اېپ خپور سو
http://bit.ly/1T2nC0U

«جادو ته ورته» د پښتو قاموسونو پروګرام آنلاين سو
http://bit.ly/2dUVS3U

 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د کاپي کولو په صورت کي د دغه ليکنې اصلي لينک او د ليکوال نوم يادول ضروري دي.
Legal Note حقوقي يادونه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 

خپله تبصره لاندي ثبتولای سئ

0
ستاسو تبصره به د مسؤلو کسانو د کنټرول وروسته خپره کړله سي.
  • پر دغه مطلب ته اوسه کومه تبصره نده سوې.
Loading...
Loading...