Close

ږيره قبضه او کتاب ـ منظوم نکل

 پروت کتاب ؤ په مسجد کي له وختونو
څرمن جلد يې ؤ پټ سوی په ګردونو
يوه ورځ چي ملا بوخت ؤ مسجد پاک کړي
له تاخچو له دروازو چي ليري خاک کړي
دې کتاب ته يې سو فکر په لوستو سو
په لوستو کي پسي دی په څملاستو سو
ليکل سوې په کتاب کي دا جمله وه
د لومړۍ پاڼي په سر کي برمله وه
«تر قبضې چي د چا ږيره لا اوږده وي
ډېر بېعقل وي که علم يې هم زده وي»
په تلوار سره يې بنده دروازه کړه
ملا ژر په موټ کي ږيره اندازه کړه
ګڼه ږيره يې ببره وه غښتلې
تر قبضې ډېره اوږده وه راوتلې
سمدلاسه ملا خپل ځان ته ګويان سو
ايا زه هم يم بېعقل په بيان سو
داسي نه چي مقتديانو وي لوستلی
دا مضمون او دا کتاب يې وي کتلی
د نادان چي پر ما ونه کړي ګومان دوی
راته امر نه کړي هسي ماشومان دوی
داسي نه چي رخشند جوړ د دې قريې سم
بې روزګاره قرباني د دې قضيې سم
ژر رهي سو ملا ولاړی و خپل کور ته
ايسټوپ راوړه چي يې سم کړم ويل مور ته
ځان ته جوړه چي بهانه کړي دا يې پلان ؤ
لنډه ږيره کړي په اور دا يې ميلان ؤ
خو په اور يې ټول مخ وسوځېد لمبه سو
تک تور سکور سو پړسېدلی لو لپه سو
په سوځلي مخ روان ملا رهي سو
مستقيم د مسجد لوري ته سهي سو
هلته پرانستی ملا څرمي کتاب بيا
د قبضې بيان يې راوست سو بېتاب بيا
پر دې پاڼه حاشيه يې نوشته کړه
دا خبره يې ښکاره او برجسته کړه:
«تجربې ته اړتيا نسته حقيقت دی
اوږده ږيره درلودل لوی حماقت دی»
دا چي ږيره څه تعلق لري په عقل
سوال به کله کړي له ځانه يو کمعقل
بل سنت چي د نبي عليه سلام دی
دا معلوم خو يو اصل د پاک اسلام دی
نو دا زده مو کړه له دغه يو داستانه
له کيسې دغې کوچنۍ، واړه چيستانه
ګټه نه لري کتاب صرف لوی تاوان وي
هم ليکونکی هم لوستونکی چي نادان وي

 

احمدولي اڅکزی، د ۲۰۲۰ کال د می ۹مه نېټه، بون

 

د ماشومانو د منظوم او منثور نکلونو وېبپاڼه
www.kochnai.com

د کوچنی ټکی کام د نکلونو ليسټ او لينکونه
http://bit.ly/2ppNEpJ

د احمدولي اڅکزي د نظمونو ليسټ او لينکونه
http://bit.ly/2h9CRwc

د ماشومانو له پاره د نظمونو ليسټ او لينکونه
http://bit.ly/2tfIG1u

د قاموسونه ټکی کام ټول اعلانونه
http://bit.ly/2fZf7dO

د تکراري سوالونو جوابونه
FAQ http://bit.ly/1IZm3uV

د قاموسونه ټکی کام څخه د کار اخيستلو ويډيو
http://bit.ly/2gXsf0v۲۴

وړيا پښتو قاموسونه د اندرويد موبايل له پاره
http://bit.ly/1IFKLAw

د آی فون لپاره هم د پښتو قاموسونو اېپ خپور سو
http://bit.ly/1T2nC0U

«جادو ته ورته» د پښتو قاموسونو پروګرام آنلاين سو
http://bit.ly/2dUVS3U

 

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د کاپي کولو په صورت کي د دغه ليکنې اصلي لينک او د ليکوال نوم يادول ضروري دي.
Legal Note حقوقي يادونه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 

Loading...
Loading...