بده ښځه ـ منظوم نکل

کيسه کوم چي لا تازه ده
رشتيا به وي که اوازه ده

کيسه کوم چي لا تازه ده
رشتيا به وي که اوازه ده
ليکل پر ما قضا پر تا ده
دا افسانه که دا رشتيا ده
وايي يو کلي کي خپره سوه
داسي افواه دا نغاره سوه
ښځه پيدا چي سوه يو بده
وکړ تېری چي چا تر حده
ملک ويل تلله بازار ته
يوازي دا ولي کوم چار ته؟
ملا ويل زړه به يې غل ؤ
صرف به شيطان ورسره مل ؤ
قاضي ويل ژر يې سنګسار کړئ
غار ورته جوړ ژر دا ايسار کړئ
بنده يو نيک هم هلته ناست ؤ
تل چي به رب ته په درخواست ؤ
هغه ويل رب دي يې مات کړي
بدکار دي ټول خراب خراب کړي
مړه دي سي ټول چي بدکاران دي
پټ چي شيطان رياکاران دي
خو رب دي پرېږدي څوک چي پاک دي
مردار دي سي څوک چي ناپاک دي
همدا ؤ درب سو مرګی خپور سو
کلي کي جوړ لوی شورماشور سو
څوک چي بالغ او نارينه ؤ
ساه يې ختل د مرګ مېلمه ؤ
خالي سو کلی له سړيو
هم له سپرو او هم له پليو
له مرګي پاته ماشومان سول
بل صرف زنان ټول په امان سول

احمدولي اڅکزی، د ۲۰۱۹ کال د دسمبر ۱۲مه، بون