د ښکار پر وخت په يو ځنګل کي يو پاچا
سو د وزير او د غلام څخه جُدا
درې واړه ورک سول ځغلول يې خپل آسونه
يو خو پرېشان ول بل يې ستړي کړل ځانونه
غلام لومړی ؤ چي يې وليدی يو پير
په سترګو ړوند ؤ په فکرونو کي راګير
نه ستړې مسې نه دعا او نه سلام
غلام د آس د ځينه پېل کړ خپل کلام
ويل اې ړونده د سپرو حال راته وايه
که دي ليدلي له نژدې او يا له ورايه
پير ويل بېله تا مي څوک ندی ليدلی
پر دغه لور باندي کوم سپور ندی راغلی
يو ساعت وروسته بيا وزير دلته راپيښ سو
تر ونې لاندي د سپين ږري حال ته هېښ سو
وزير سلام وکړ لومړی او بيا پوښتنه
ويل بابکه د اخلال غواړم بخښنه
زما د ملګرو آسسپرو حال راته وايه
که دي ليدلي له نژدې او يا له ورايه
پير ويل ستا مخکي راغلی يو آسسپور ؤ
پسله پوښتنې په ترپا پر هغه لور ؤ
د وزير تلو وروسته پاچا راغلی و پير ته
په ډېر ادب سره ګويان سو دې زهير ته
ويل سلام دي وي پر تا اې عزتمنده
په تجربه کي د کلونو ثروتمنده
که زحمت نه وي معلومات مي لږ په کار دي
ايا ليدلي دي سپاره پر دغه لار دي؟
ړانده پاچا ته ويل زه دي تر تا جار سم
علحضرته عالي قدره تر تا زار سم
له دې څخه مخکي ستا غلام بيا ستا وزير
ول سرګردان ستا په تلاښ کي ډېر زهير
پاچا ويل د رتبو حال چا درته در کړ؟
ؤ دا غلام او که وزير دا احوال در کړ؟
ړانده ويل په خپل اخلاق هر څوک عيان دی
معلوم پاچا غلام وزير په خپل بیان دی
نه د نيکونو نه د زرو کوم حاصل وي
اصيل هغه وي چي ګفتار يې د اصيل وي
احمدولي اڅکزی، د ۲۰۱۶ کال د جنورۍ ۲۰مه نېټه
هيله: که مو دغه مطلب خوښ سوی وي نو هيله ده چي په فيسبوک کي يې share کړئ.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د کاپي کولو په صورت کي د دغه ليکنې اصلي لينک او د ليکوال نوم يادول ضروري دي.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د دغه وېبلاګ لاندنۍ نوري ليکنې هم ولولئ:
ننداره ده ننداره ـ د ماشومانو شعر
شعر: د اصيل خېلو کانفرانس
زمری او نانی موږک ـ د ماشومانو لپاره منظوم نکل
څلور دي کال کي موسمونه ـ د ماشومانو شعر
د ملالۍ نانۍ خور ـ د ماشومانو شعر
سهار سو ـ د ماشومانو شعر
ترپ و تروپ دی ـ د ماشومانو شعر
اې سپيني واوري ـ د ماشومانو شعر