منطق او تعليم ـ منظوم نکل

: Published: 06 August 2016

source of image: http://www.adweek.com/files/imagecache/node-blog/sa_article/education_2_76708792.jpg

د يو هيواد ؤ يو باچا
خدای کړ يو زوی ورته عطا
باچا غوښتل چي زوی يې وي
ډېر ښه باچا او ډېر ذکي
چي د رايا وي خدمتګار
وي دی عادل او ښه سرکار
همدا ؤ ورکړ باچا زوی
يو لوی عالم ته په زارۍ
ويل سرمشق يې ته د ټولو
د کشر مشر او همزولو
که فلسفه او که منطق دی
پکښي ستا علم ډېر دقيق دی
رياضيات ستا دی مسلک
ورکوې ته پکښي سبق
واخله زما زوی خپل يې شاګرد کړه
ورته ور زده خپل علم ګرد کړه
چي ستا په شان لوی سو عالم
حاضر يې کړه بيا په تعظيم
عالم راضي سو و دې کار ته
لوړه يې ورکړه و دربار ته
وختونه تېر هلک عالم سو
خلاص يې ټول درس او ټول تعليم سو
استاد شاګرد راغلل دربار ته
د خپل باچا و جوړ بنډار ته
باچا ويل اې زما زويکه
د زرين تخث اصلي لايقه
زه نن کوم يو څو سوالونه
ستا څخه غواړم جوابونه
غواړم معلومه کړم ستا پوهه
چي ده سويه ستا د کوم ګروهه
بيا باچا وپوښتل چي څه دي؟
پټ زما په مټ کي چي دي څه دي؟
هلک هم پېل کړل حسابونه
په کار يې واچول علمونه
يو ساعت وروسته بيا ګويان سو
د و خپل پلار ته په بيان سو
څه چي ستا مټ کي په ځلا دی
ويل جوړ سوی له طلا دی
جوړښت يې بالکل حلقوي دی
غمي لري منځ يې خالي دی
باچا ويل درست دي بيان دی
پټ ټول حالت درته عيان دی
خو اوس جواب غواړم زه ځوانه
پټ مي په مټ کي څه دی ګرانه
هلک ويل قيمت تر عاج دی
پټ ستا په مټ کي ستا خپل تاج دی
په دې جواب دربار حيران سو
څوک وارخطا څوک پرېشان سو
مټ تړل سوی د کيڼ لاس
باچا په رېږد سره کړ خلاص
په مټ کي پټه طلايي وه
ګوتمۍ چي ښکلې او شاهي وه
مخ باچا واړوی عالم ته
ويل حيران يم تا ظالم ته
ښوولې تا ده دا څه پوهه
چي هلک دی داسي ناپوهه
عالم ويل والاحضرت
ډک ؤ زما زړه هم له حسرته
چي علم ټول ورته ورزده کړم
حتی زه پوهه ور کوزده کړم
ثبوت يې دا رښتيا بيان ؤ
چي دی په نخښو کي ګويان ؤ
چي ستا په لاس کي طلايي ؤ
څيز قيمتي او حلقوي ؤ
خو دا چي تاج تر مټ ډېر غټ دی
د دې هلک له منطق پټ دی
هر څه که زدکړي څوک علوم
قانون فطري دی يو معلوم
چي غير حاضر پکښي منطق وي
تعليم عبث ستړی ناطق وي

احمدولي اڅکزی، د ۲۰۱۶ کال د اګست ۶مه نېټه، بون

وروستي خپاره شوي مطالب