شيطاني لاره ـ منظوم نکل

ابليس چي کله انکار وکړ له سجدې
د رب له حکمه په سرکښه ارادې

ابليس چي کله اِنکار وکړ له سجدې نو
دی لا سرکښه سو په بدي ارادې نو
لومړۍ ګناه يې ازلي کړله ايجاده
په دې ګناه خپله ارواح يې کړه برباده
تر بل هر چا يې ځان بهتر باله په نسل
آدم يې ټيټ باله، خپل ځان يې باله اصل
د قوم بازۍ ټبر پالنې رسم جوړ سو
په آدمزادو کي بيا هم دا مرض خپور سو
په انسانانو کي چي څوک اوس قومپرست وي
د رنګ ټبر ژبي او سـيمي بت پرست وي
په دې دي پوه سـي: د ابليس پر لار روان دی
په رنګ انسان خو په باطن کي لوی شـيطان دی

څوک چي اخلاق لري حاکم پر نفس د ځان وي
چي تقوادار وي بهتر صـرف هغه انسان وي

د ۲۰۱۷ کال د می لومړۍ نېټه، بون