ټول انسانان له يو نسله دي

انسان هغه دی چي خوی يې د انسان وي

 له بده مرغه داسي جاهل او بېلاري توکمپال/نژادپرست انسانان سته چي نه يوازي د ژبي او قوم پر اساس انسانان پر بيلو نسلونو ويشي بلکه په دې باور دي چي د ځانګړي ژبي يا قوم سره تړاو د برترۍ نخښه ده . حال دا چي هر هغه څوک چي پر هوښ او سد وي دا درک کولای، معلومولای او حس کولای سي چي ټول انسانان له يو توکم او له يو نژاده دي او دا چي په انسانانو کي بېل نسلونه او نژادونه نسته.

 
په زياته بيا د انسانانو تر منځ د پوستکي رنګ يا د ځانګړي سيمي/قوم/ژبي سره تړاو هيڅکله هم د برترۍ نخښه نه سي کېدلای. انسان هغه دی چي خوی يې د انسان وي. خو نسل پرستي يا نژادپالنه هيڅکله هم يو انساني خوی نه سي کيدلای.
 
هغه څوک چي د ژبي/قوم/سيمي/پوستکي يا نورو فرقونو له کبله ځان تر نورو بهتره بولي يا پر دې اساس انسانان پر نسلونو ويشي، نو په دې سره نه يوازي خپل ځان له انسانيت، انساني خوی او اخلاقو څخه بيرون کوي بلکه دا هم په اثبات رسوي چي په دې تړاو پر ساينسي او منطقي دلايلو ړوند او کوڼ دی.
 
د يو کس يا ډلې په ګناه بشپړه ژبه، سيمه يا قوم مسؤل نيول او ورڅخه کرکه يا حساسيت کول د توکمپالنې پر لور د لومړي قدمونو څخه يو قدم کيدلای سي.
 
که څوک غواړي چي ځان ته معلوم کړي چي ايا په رشتيا له انساني نسله څخه دی که نه، نو دي په ځان کي د نورو انسانانو په وړاندي عاطفه، مينه او پيروزينه ولټوي، که دا څيزونه موجود ول نو له ښه نسله څخه دی.
 
احمدولي اڅکزی، ۲۰۲۰ کال د مارچ ۲۰مه نېټه
يادونه: دغه کرښې د هغه وروسته ليکم چي د يو دوکتورا لرونکي جاهل افغان توکمپال غير انساني او غير اخلاقي له توکمپالنې ډکي کرښي مي پر فيسبوک ولوستلې.